Էկոկրթական միջոցառումներ Հայաստանի բնության պետական թանգարանում:
ՀՀ բնապահպանության նախարարության հովանու ներքո ձևավորված «Պատանի բնասեր» ակումբում իրականացվող էկոկրթական միջոցառումների շարքում իր ուրույն տեղն է գրավում Հայաստանի բնության պետական թանգարանը: Վերջինս հանդես է գալիս էկոդաստիարակչական և էկոքարոզչական եզակի գործունեությամբ:
Միջոցառումների շրջանակներում ՀՀ Գեղարքունիքի մարզի Գեղարքունիք գյուղի միջնակարգ դպրոցի աշակերտները այցելել են «Հայաստանի բնության պետական թանգարան»։ Թանգարանում աշակերտներին ողջունել է ՀՀ բնապահպանության նախարարության Էկոկրթության բաժնի պետ Անահիտ Մուրադյանը:
Թանգարանի գիտաշխատողների ուղեկցությամբ պատանի բնասերները ծանոթացել են մշտական ցուցադրությունում ներկայացվող Հայաստանի բուսական և կենդանական աշխարհի բազմազանությանը, ինչպես նաև ստացել Հայաստանի ձկնատեսակների վերաբերյալ հետաքրքիր տեղեկություններ, թանգարանում գործող կենդանի ցուցադրության սրահում: Սաները թանգարանից հեռացան տպավորված Հայաստանի բնաշխարհի վերաբերյալ ստացած գիտելիքներով:
Ակնկալում ենք, որ նրանցից յուրաքանչյուրը այսուհետ հետամուտ կլինի խնամքով և սրտացավությամբ վերաբերվել մեր բնությանը և պահպանել շրջակա միջավայրը։